علی آقا واحد
کؤنول، وفاسیز اولان نازلی یاره یالوارما نه اعتبار اولا، بی اعتباره یالوارما داریخما، یاخشی-یامان روزگاریمیز کئچه جک بو بئش گون عؤمره گؤره روزگاره یالوارما سنین ده بیر گون اولار نوبهارین، ای بولبول بو ذؤقسوز، بو صفاسیز باهاره یالوارما(1) دوشنده موشگوله، بیر اهل حاله دردین دئ علاجین اوندادیر، اوندان کناره یالوارما فقیره، عاجیزه، مظلومه، احترام ائیله عدویه، قان ایچنه، ظلمکاره یالوارما وطن یولوندا اؤلوم مرد اوچون سعادتدیر حیات اوچون فلک-کج مداره یالوارما مخالف اهلینه باش اگمه، سن ده منصور اول (انا الحق) اوسته چکیلسن ده داره، یالوارما نه اولدو دؤولت جمشید، مولک اسکندر؟(2) نه تاجیره، نه ده بیر شهریاره یالوارما اگر حیاتینی، واحد، خوش ائتمک ایستیرسن نه گول جفاسینی چک، نه ده خاره یالوارما 1- مصراع بئله ده قئید اولونوب: خزان جفاسینا صبر ائیله، خاره یالوارما 2- مصراع بئله ده قئید اولونوب: محبت اهلینه، واحد، همیشه خدمت ائله |
+ نوشته شده در سه شنبه نهم آبان ۱۳۹۱ ساعت 8:30 توسط یحیی
|